2024

Tääpänä oon 07. marsikuuta 2024.

Se oon ensimäistä kerttaa ko kirjaan tähän Google site nettilaithaan. Itte luulen ette Blogger oon parempi (tästä syystä nimi "BLOGger").

Ystävälinen muistutus, ette en ole flinkki kirjottahan, enkä pruukkaa pittäät päiväkirjaa. Tämä oon tyhä paikka missä saatan kirjottaat kväänin kielelä. Myönnän ette häyttyisin käyttäät enämen kväänii. En meinaa kirjottaat joka päivä, mutta freistaan. Viimen tajusin mie ette minun kielen taito oon tullu ruosteiseksi; minun saathiin uskohan ette pystyn praatahan kväänii. Mutta meinaan totta, enhän mie pysty toelisuuessa. 

No joka taphauksessa, tämä oon vaan minun pikku "rant".

Tääpänä oon 15. marsikuuta 2024.

Hyvvää kvääninkansan päivvää kaikile.

Onnee kvääninkansan päiväle.

Se oon synti ette en ole Ruijassa.

Ajattelin tääpänä, ette koska saatan reisata Ruijhaan. Näyttää siltä, ette tänä vuotena Paaskiviikon arranseerathaan varhain Juunikuussa Hansinkentässä ja likheissä Rässikäisessä. Jos minula oon aikkaa, saatan olla pois universiteetin tiimoilta pariksi päiväksi ja osalisttuut festivaalhiin.

Huom! Wikipedian jälkhiin Kvääniflaku ei ole julkisessa verkkodomeenissa. Mulla oon pakko mainita sen kalttiin. No tässä, ole hyvä.

Tääpänä oon 20. marsikuuta 2024.

Hyvvää kevätaijantassaajaa!

Tääpänä oon kevätaijantassaaja, ja tuntuu jo pöräti lämpimältä. 

Tänä vuontena meilä ei ollu paljon lunta, ja mailma tuntui erilaiselta ilman valkkeetta. 

Muistan, ette kuusi vuotta sitte marsikuusa ko reisasin ensimäsien kerran Suomheen, se oli pakkasta.

Se oon hirmu huolestuttavaa, kunka kuumat menheet kuukauet olthiin, ja ei kukhaan sen tahi kliimanmuutoksen ylheisesti ympäri puhu. Outo juttu.

Tääpänä oon 31. marsikuuta 2024.

Hyvvii päässiissii!

Nyt oon kesäaika, kelloi siirethään tunnila etheenpäin.

Mulla oli viimen vappaa aikkaa "pikkureisule".

Wrocławista tyhä 2 tiiman päässä, Bytom Odrzański oli kerran Tyskän kylä, mutta tässä näjemä ette tyskäläinen kulttuuriarpa siirtyi sukupolvelta toisele vaikka oon nyt Puolan rajan sisäpuolela.

Tääpänä oon 03. apriilikuuta 2024.

Aamula kolmelta mun veli rinkas minule Taiwanissa sattunheesta tuhhoovasta maanjärityksestä. Voiman (voimakkuuen) mitathiin 7.4 Richterin skaalala, ja episentteri makkas tyhä kilomeetteriitten päässä Hualianista.

Pääkaupunggissa Taipeissa intensiteetti oli heikko 5 Taiwanin Meteorologiin Laitoksen (中央氣象署) skaalala.

Tähän saakka oon kuollu jo 10 ihmistä ja faleerathiin vähittäin 3 pytinkkii.

Monet Taiwanissa ei saanheet varhaista varotusmellinkkii heiän omila käsefuuniila glitchin vuoksi, mutta toishaalta Japanin Okinawassa tsunami-varotussysteemi otethiin käythöön heti.

Tajusin justhiin ette kväänin kielessä ei ole paljon sannoi maanjäristyksen ympäri sanapuohissa. Piian se oon sen tähen ette Pohjais-Ruijassa maanjäristyksii ei mitata tavalisesti.

Tääpänä oon 09. apriilikuuta 2024.

Olin tääpänä myötä Kainun Institutin järjestelmän Kielikafean kaha, jossa praatima kväänin kylttyyristä. Se oli soma praattiit kväänin kieltä Ailin, Merethen ja muitten kaha. Net kekkä päästhiin osaliseksi tulthiin Romaniasta ja Tromssasta. Olihan se internasjunaali roikka.

Kväänin kylttyyri oon nyt elossa ja sen nostethaan framile, se oon erytyinen nähhä ko vanha kväänin kylttyyri kohattellee uutta kväänin kylttyyrii.

Jos halluut kans olla myötä tapattumassa, muista kuorata Kainun Instituttii Facebookissa.

Tääpänä oon 22. apriilikuuta 2024.

Tääpänä oon Maan päivä.

Olen kuulu sen ympäri ette jos satsaama yhtheissiin alkupäräiskylttyyrin suojelemisen pääle niin saatama kaha suojela maapallon luonnosta.

Tääpänä oon 07. maikuuta 2024.

Sain justhiin Bachelorin avhantlingin valmhiiksi.

Yhtenä päivänä se idee tuli mielheen ette syöhhäänkö kainulaiset karjalaissii piirakkoi?

Karjalan kielessä sitä käskethään "šipainiekuksi" ja se oon saanu minun hunteerahan oonko kväänissä ommaa nimmee tälle ruovale.

NRK Kvääni käytti sitä sannaa "karjalainen piirakka" tässä artikelissa. 

Mie en hakenu sitä Oahpassa.

Tääpänä oon 16. maikuuta 2024. Meän universiteetissa feirathiin karriääripäivvää. Kentälä oli puliisi- ja militääripuohi, jokka freistathiin rekryteerata studentiita. Yksi sotilas kerttoi minule ette sota Ukrainassa johonki laihiin pakoittaa hunteerahan tarvittemmako vanhoi praksiisiita.

USA ja monet euroopalaiset maat oon aboleeranheet (poistanheet) velvolisen sotapalveluksen, mutta viimiaikhoin oon ollu puhet uuesti pithoon ottamisen ympäri. Esimerkiksi Ruotti oon otettu uuesti käytthöön ja Tyskän puolustus­ministeri sanoi justhiin ette sen poistaminen oli feili, eriliikaisesti tila oon Ryssän aggresjuunhiin suunattu. 

Ei kukhaan halluu sottaa, eikä kukhaan halluu sotapalvelusta. Mutta eikö nykytila ole outtoo tahi vastakohtaista? 

Met sikkaristi emmä saata tiettäät koska uhka tullee meile, mutta argumenteeraan ette väkivallattomiita konfliktiratkaisui häyttyy panna korkkeele. Nämät piethään sisälä dialoogi, sanksjuuni, ja kanssoinvälinen (internasjunaali) oikheus. Toinen oon se ette ilman voimatasapainotta Maailman kauppaorganisasjuuni tahi YK:n diplomatii ei toimi.

Meinaan ette olen pasifisti (joku joka oon osa rauhanliikkheistä), ja kaikki häy'ythään olla. Olen ollu aina militäärismii vasthaan. Mulla oli nokko onnee ko onnistuin päästäät Taiwanin sotapalveluksesta.

Tääpänä oon 04. juunikuuta 2024.

Tässä kuussa mulla oon hoppu, mutta se oon kans tärkkee tiettäät ette feirathaan Pride-kuukautta. Tulen olehan myötä Pride-paraatissa tulevana lauvantaina. Kirjotan sitte uuen blogin, kuorakkaa!

Mie kävin hiljattain Legnicassa ja Świdnicassa, ja kohattelin yhen vanhan ystävän, joka assuu nyt Barcelonassa. Hän oon Palestiinasta pois, ja kävimä universiteettii yhessä vuoessa 2019. Olen kiitolinen siitä ette hyvin se mennee hänen perheele.

Mutta hänele probleemi oon se ette se oon vaikkee löyttäät työpaikan joka oon 100% virkhaan, ja oon avoina ulkomaalaisille. Meinaan totta, nyt ei saata saaha työpaikan ilman työkokemusta ja Master's graadii.

Viimi viikola puolustin minun avhanllingin eksaamenissa. Tämä meinaa ette lopetan opinon kuukauen päässä.

Tääpänä oon 27. juunikuuta 2024.

Reisasin tällä viikola Malthaan ystäviin kaha. Tällä kerrala met kävimä molemissa Vallettassa ja Gozossa. Malta oon uppee maa, tykkään eriliikaisesti uniikista vanhakaupungista ja Maltan kielestä. Malta antoi mulle semmosen Italian stemningin, sillä ko löytyi sielä omat arkitektuurityylit ja kylttyyri. Mutta suorhaan sanottunna met kaikki emmä triivastunheet ko oli liikkaa paljon ihmissii. Olimako met pettyneet? No siis, vähän. Turistiattraksuunit itte ei olheet probleemit, se oli tyrismielämänkeino mikä, ja vielä, tärväs lokaalii kylttyyrii ja miljöö. Meiän mielestä se oon paras reisata muihin paikhoin, missä semmosta tärväämistä ei ole, ja ommaa kylttyyrii oon kunnioitettu.